Siðspilltasta þjóð í heimi?

Ég held að við Íslendingar höfum sett eitt metið enn........ Siðspilltasta þjóð í heimi.

Nú er verið að auka álögur á skrílinn sem býr í þessu landi á meðan gjörspilltir athafnamenn víla og díla um hvernig þeir geta nýtt sér tækifærin í kreppunni og allt gera þeir þetta beint fyrir framan siðspillta stjórnmálamenn sem virðast gjörsamlega á skjön við fólkið í landinu. Það sést í brosi þeirra þegar þeir þurfa að laumast inn á ríkisstjórnarfund bakdyrameginn vegna mótmælenda, að þeim er nákvæmlega sama hvernig fólki líður og hvaða skoðanir það hefur.

Það hafa fjölmargir verið að tala um tækifærin sem myndast í kreppu, ég skora á þessa menn að benda fólki, sem nú er atvinnulaust, lánin þeirra vaxin uppfyrir vermæti eigna, afborganir óviðráðanlegar og ekkert blasir við nema eymdin ein. Hvar eru tækifæri þessa fólks?

 

Alvarlegra að stela vodkaflösku heldur en að setja þjóðina á hausinn.

Þessari ríkiststjórn Geirs og Ingibjargar hafi tekist að klúðra öllu sem hægt er að klúðra með hjálp Seðlabankastjórnar og Fjármálaeftirlits. Hefði þetta fólk hætt að hugsa um sinn pólitíska rass og hagsmuni flokka sinna og félaga, sett þjóðarhag á oddinn þá hefðu þau vikið til hliðar, beðist afsökunar og leift fagmönnum að bjarga þjóðinni frá gjaldþroti. Við erum sannanlega gjaldþrota. Nú blasir við gríðarlegt atvinnuleysi, óðaverðbólga og landflótti, hver á þá að borga skuldirnar. Það hvarflar varla að nokkrum meðalgreindum manni að fara að borga af íbúðarlánum sem eru orðin mikið hærri heldur en það verð sem fengist fyrir eignina. Það er engu líkara að þetta lið sé steinsofandi með tappa í eyrum og lepp fyrir augum. Væri ekki tímabært fyrir þennan líð að fara að hlusta á fólkið í landinu. Það leggst sá grunur að manni að það sé verið að fela eitthvað, Fjárglæframennirnir eiga allir með tölu að sæta gæsluvarðhaldi meðan á rannsókn stendur svo þeir geti ekki falið svikaslóðina, það á að frysta eignir þeirra meðan á rannsókn stendur. Ef eitthvað saknæmt kemur í ljós eiga þessir menn að fá þyngstu refsingu helst ævilangt fangelsi.

Það er hjákátlegt að lesa í blöðunum að karlmaður 48ára hafi verið dæmdur í Héraðsdómi Reykjaness í eins mánaðar fangelsi fyrir að stela einni vodkaflösku að verðmæti kr. 3.250 á meðan þeir sem eru búnir að setja stóran hluta þjóðarinnar á hausinn og svikið út fé af saklausu fólki um víða veröld ganga lausir og hafa óskert ferðafrelsi og eru farnir að leita eftir nýjum tækifærum.

Þess skal getið að sá sem stal vodkaflöskunni þarf að greiða ÁTVR flöskuna auk dráttarvaxta.

 

Hroki

Ef fjölmennir mótmælafundir, borgarafundir og skoðanakannanir endurspegla ekki vilja þjóðarinnar þá veit ég ekki hvað er til ráða, það er ekki eins og það hafi verið daglegt brauð hér á Íslandi að fólk fjölmenni á svona samkomur.

Það virðist sem ráðamenn fylgist ekki með fréttum.

Ég spái oft í það hvort þetta fólk í ríkistjórn,Seðlabankanum,Fjámálaeftirlitinu og bönkunum eigi enga vini eða ættingja sem gætu bent þeim á að þjóðin er ósátt við aðgerðarleysi og aumingjaskap.

 

Hvað er það fyrsta sem þessu fólki dettur í hug? Það er að frysta lán, efla atvinnuleysisbótakerfið og fleira í þeim dúr,(sem er reyndar nauðsynlegt líka)en væri ekki meira vit í að reyna að halda uppi einhverri atvinnu í landinu og fyrirbyggja að allt það efnilega fólk sem nú er að flýja land fari. Það er  nokkuð öruggt að hægt væri að nota eitthvað af þeim peningum sem fara í atvinnuleysisbætur til að  framkvæma og skapa þar með atvinnu td í byggingariðnaði að reyna að klára þau hús sem byrjað er á til að forða því að hálfkláraðar byggingar eyðileggist og þau verðmæti sem þar eru glatist .  Ég er sannfærður um að fólk í landinu sem starfar við byggingariðnað yrði mun sáttara við ykkur. En það bólar ekkert á aðgerðum fyrir fyrirtæki í landinu, það er ekki nóg að tala um sprotafyrirtæki og ferðaiðnað þó það sé góðra gjalda vert.

 

Það væri mjög gott fyrir alla þjóðina að þetta óhæfa fólk sem nú er við stjórnvölinn  í ríkisstjórn,seðlabanka og fjármálaeftirliti myndi víkja og hleypa fagfólki að og fá erlent fagfólk til að rannsaka hvað fór úrskeiðis þannig að tryggt sé að það verði allur óþverrinn komi upp á yfirborðið.